اب کے تجدید وفا کا نہیں امکاں جاناں
یاد کیا تجھ کو دلائیں ترا پیماں جاناں
یوں ہی موسم کی ادا دیکھ کے یاد آیا ہے
کس قدر جلد بدل جاتے ہیں انساں جاناں
زندگی تیری عطا تھی سو ترے نام کی ہے
ہم نے جیسے بھی بسر کی ترا احساں جاناں
دل یہ کہتا ہے کہ شاید ہے فسردہ تو بھی
دل کی کیا بات کریں دل تو ہے ناداں جاناں
اول اول کی محبت کے نشے یاد تو کر
بے پیے بھی ترا چہرہ تھا گلستاں جاناں
آخر آخر تو یہ عالم ہے کہ اب ہوش نہیں
رگ مینا سلگ اٹھی کہ رگ جاں جاناں
مدتوں سے یہی عالم نہ توقع نہ امید
دل پکارے ہی چلا جاتا ہے جاناں جاناں
ہم بھی کیا سادہ تھے ہم نے بھی سمجھ رکھا تھا
غم دوراں سے جدا ہے غم جاناں جاناں
اب کے کچھ ایسی سجی محفل یاراں جاناں
سر بہ زانو ہے کوئی سر بہ گریباں جاناں
ہر کوئی اپنی ہی آواز سے کانپ اٹھتا ہے
ہر کوئی اپنے ہی سائے سے ہراساں جاناں
جس کو دیکھو وہی زنجیر بہ پا لگتا ہے
شہر کا شہر ہوا داخل زنداں جاناں
اب ترا ذکر بھی شاید ہی غزل میں آئے
اور سے اور ہوئے درد کے عنواں جاناں
ہم کہ روٹھی ہوئی رت کو بھی منا لیتے تھے
ہم نے دیکھا ہی نہ تھا موسم ہجراں جاناں
ہوش آیا تو سبھی خواب تھے ریزہ ریزہ
جیسے اڑتے ہوئے اوراق پریشاں جاناں
احمد فراز
ISLAMIC,Al Quran, Al Hadees, 99 ALLAH Names, 99 MUHAMMAD Names, Islamic Pictures, Islamic Info, SUFISM, ISLAMIC SUFISM, Sufism Poetry, Sufism Quotes, Sufism Info, POETRY, ISLAMIC, SUFISM POETRY, Urdu Poetry, Urdu Roman Poetry, Urdu Ghazal, 2-4 Lines Poetry, Punjabi Poetry, Saraiki Poetry, Poets, URDU ADAB, ISLAMIC SUFISM POETRY, URDU ADAB, Urdu Books, Afsanay, Kahaniyan, Aqwal-E-Zareen, Personalities, WALLPAPERS ISLAMIC, SUFISM POETRY, URDU ADAB, WALLPAPERS, Islamic Wallpapers, Makkah Madina Holy Places, Flower, Nature Wallpapers.
ConversionConversion EmoticonEmoticon